ජීවිතය...

කඳුළැලි වැටී ඇති ගංගා දිය තරම

දුක් සෝ සුසුම් ඇති සැඩ සුළගක් තරම

හද ඉරි තැලී ඇති රළු කතරක් තරම

දිවි මග අතරමන් වී දෝ මේ තරම...

~නෙතුපුල්~

මගේ සදාදර මිතුරියට...

වැසි වසින විට හිරු කිරණ නුඹ

හිරු දරුණු විට වැටෙන පොද නුඹ 

හිස් අහස යට දිලෙන තරු නුඹ 

නිල් දියක් වෙයි සදා මට නුඹ

රළු වළා පරදවා සැම විට 

සිත් තොසින් පුරවලා එම විට 

මල් දමින් සරසනා දිවියම 

නුඹ මගේ සොයුරියයි සැම දින...

~නෙතුපුල්~

සඳ දියවී සුනිල දියේ...

සඳ දිය වී සුනිල දියේ

අහස යටින් ඉරක් පිපේ.

තරු මිලින ව අහස තලේ

පිණි බිඳු වී බිමට වැටේ.

තරු ගණිනා අතරතුරේ

පුර හඳ මට මග නොහැරේ.

සඳ දිය වී සුනිල දියේ

අහස යටින් ඉරක් පිපේ..

මල් පිබිදී හදගිස්සේ

කොඳ සිතුවිලි ලිහී වැටේ

පියුම් පිපී සිතුම් විලේ

මුවරද මුසු පවන් රොදේ

සුවඳ දැනේ ආදරේ...

සඳ දිය වී සුනිල දියේ

අහස යටින් ඉරක් පිපේ.

තරු මිලින ව අහස තලේ

පිණි බිඳු වී බිමට වැටේ..

වන වදුලේ තුරු අතරේ

කඳු අතරේ නිම්න දිගේ

ගං තීරේ රැළි අතරේ

සිත් පත්ළේ නිසන්සලේ..

සැගව තිබේ ආදරේ..

සඳ දිය වී සුනිල දියේ

අහස යටින් ඉරක් පිපේ.

තරු මිලින ව අහස තලේ

පිණි බිඳු වී බිමට වැටේ.

තරු ගණිනා අතරතුරේ

පුර හඳ නුඹේ මග නොහැරේ

සඳ දිය වී සුනිල දියේ

අහස යටින් ඉරක් පිපේ...

ගායනය : නෙත්මි දසනායක & උමේෂ් දිසානායක

පද රචනය : වර්ෂා රණසිංහ & නජාත් අක්රම්

තනුව : සුසිත චාමිකර

සංගීතය : යහජ කල්හාර

ආදරණීය අම්මේ...

කිරි කැටි බිලිඳු වයසෙදි මා රැක ගත්තා

කිරි බිඳු පොවා මා ඇති දැඩි කරගත්තා 

කවි ගී කියා මා නිදි කරවා ගත්තා

හැකි හැම දේම මා හට දී සිප ගත්තා...

නුඹ පෙව් කිරි වලට සැමදා ණයගැතිය 

නුඹ දුන් සෙනෙහසට කවි ලීවට මදිය

එනමුත් මා දිවිය හිමි නම් මා හටය 

වෙනසක් කිරීමට නම් මා හට නොහැක...

~නෙතුපුල්~

එදවස...

ගලා එයි කළුවර

මැකී යයි හිරු සයුරු දිය මත..

බොඳව යයි දසුනද

හිස්ව යයි මී බඳුන් එකිනෙක...

වදන් රැල් මතුවී

සිතෙහි කුසුමන් පිබිදී

සිනා කැන් ඉතිරී

කලා පැතුමන් නුඹත් එක්වී...

පැතු ඒ පැතුමන්

සැබෑ කරනට මතු සදාකල්

වෙහෙසුනත් මා සැමකල්

නොසිටියා නුඹ මගේ ලඟ නම්

~නෙතුපුල්~

අතීතාවර්ජනය...

සලමින් සෝ සුසුම්

දරමින් මහද තනිකම්

හෙලමින් කඳුළු උණුහුම්

මග බලා සිටියා... එනකම්...

නොදුටු ඒ කඳුළැලි

නොඇසුනා කිසිදාක...ඒ ඉකි

නොබැලුවා ඔහු නිති 

මුලා වූ කල ඇගේ දිවියෙහි...

හෙලු කල කඳුළැල්

නොමැති වූ කල හසරැල් 

නොලද ඒ පෙම් මල්

බලා හිඳිනේ කිමද...තව කල්?

~නෙතුපුල්~

සුභ නව වසරක් වේවා!

පතනා සියලු පැතුමන් ඔබෙ ඉටු වේවා

සිතනා සියලු දේ එම ලෙස සිදු වේවා 

කරනා සියලු දේ හට ජය අත් වේවා

ලබනා නව වසර සුබ වසරක් වේවා...

~නෙතුපුල්~